ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងថាសន្ដិភាពមិនត្រឹមនាំឱ្យមនុស្សអាចជួបជុំគ្នារួមរស់នឹងគ្នាវិញនោះទេ សូម្បីតែអទិទេពក៏ត្រូវបាននាំត្រលប់ជួបជុំគ្នាឡើងវិញផងដែរ។
ថ្លែងក្នុងពិធីទទួលវត្ថុបុរាណខ្មែរ ដែលបានប្រគល់ជូនព្រះរាជាណាចក្រកម្ពុជាវិញព្រឹកថ្ងៃទី១៧ ខែមីនា ឆ្នាំ២០២៣ នៅវិមានសន្ដិភាព សម្ដេចតេជោ ហ៊ុន សែន បានថ្លែងថាពេលនេះឪពុកកូនគ្រួសារព្រះសិវៈបានត្រលប់មកជួបជុំគ្នានៅលើទឹកដីកម្ពុជាវិញហើយបន្ទាប់ពីបែកពីគ្នាយ៉ាងច្រើនឆ្នាំដោយសារសង្គ្រាមរួចមក។
សម្ដេចតេជោថ្លែងថាការវិលត្រលប់មកជួបជុំគ្នានេះគឺដោយសារកត្តាសន្ដិភាពដែលកម្ពុជាកំពុងមានសព្វថ្ងៃ។
សម្ដេចថា៖ «ក្នុងសម័យនេះសន្ដិភាពគឺមានសារៈសំខាន់បំផុតមិនត្រឹមតែសម្រាប់មនុស្សធម្មតានោះឡើយប៉ុន្ដែគ្រួសារអទិទេពក៏ត្រូវការនូវសន្ដិភាពដើម្បីជួបជុំគ្នាឡើងវិញ»។
នាយករដ្ឋមន្ត្រីបញ្ជាក់ថាបច្ចុប្បន្នរដ្ឋាភិបាលកំពុងធ្វើការស្រាវជ្រាវស្វែងរកសម្បត្តិវប្បធម៌ដែលត្រូវបា្នលួចចេញពីកម្ពុជាមកកាន់ប្រទេសដើមវិញផងដែរ។
រូបសំណាក់ព្រះសិវៈព្រះនៃការបង្កើតលោក និងកូនព្រះគណេសជាព្រះនៃប្រាជ្ញា និងព្រះស្កន្ទជាព្រះនៃសង្គ្រាមបានវិលមកជួបជុំគ្នា នឹងត្រូវបាននាយរដ្ឋមន្ត្រីគោរពបួងសួងសុំសេចក្ដីខុសផងដែរនៅព្រឹកថ្ងៃទី១៧ ខែមីនានេះ៕
